1-year-old na bata patay matapos magulungan ng pick up vehicle sa Koronadal
KORONADAL CITY, South Cotabato- Dead on arrival sa South Cotabato Provincial Hospital ang 1 taong gulang na batang babae matapos masangkot sa vehicular crash sa Waling-waling St., Brgy. Zone 4, Koronadal City.
Ayon sa Koronadal PNP, ang nasabing bata ay 1 year old na nakatira sa Barangay GPS nitong lungsod.
Ang paslit na biktima ay nagtamo ng malubhang mga sugat matapos mabangga ng isang pick-up vehicle malapit sa Rizal Park.
Lumalabas sa inisyal na pagsisiyasat ng mga pulis na hindi namalayan ng ina na bumili ng mga bulaklak na humiwalay sa kanya ang kanyang anak at pumunta sa daan na katabi lang ng flower shop.
Sa panayam naman ng Radyo Bida kay alyas Tonton, isa sa mga nakakita sa aksidente, tumakbo umano papunta sa daan ang batang babae, ngunit nadapa ito at tiyempong nasagasaan ng Strada pick-up at aksidenteng nagulongan.
Ang driver naman ng sasakyan na nakabangga sa biktima na si Melvin Apenton, 51 years old ng Barangay San Jose, Koronadal ay ikinustodya ng Koronadal PNP.
Ito ay habang nagpapatuloy pa ang kanilang imbestigasyon sa insidente.