2 sugatan sa ambush sa Cotabato City

Patuloy na ginagamot sa ospital ang dalawa katao matapos tambangan at pagbabarilin ng mga di nakilalang suspek alas tres ng hapon kahapon sa Tamontaka 3, Cotabato City.

Ang mga biktima ay nakilalang sina Anas Naga, driver at Datu Ameer Diocolano, mga nasa hustong gulang, nakatira sa nabanggit na Barangay.

Batay sa salaysay ng isa sa mga biktima, patungo sila sa lugar lulan ng isang Toyota HiAce van upang sunduin ang isa pang kaanak nang bigla silang ratratin ng mga suspek gamit ang mga di natukoy na kalibre ng baril saka mabilis na tumakas.

Sa kabila ng mga tinamong sugat ay nakayanan pa ng ddriver na si Naga na magmaneho patungo sa pagamutan.

Iniimbestigahan na ng kapulisan ang insidente upang mabatid ang tunay na motibo ng amush.