3 mekaniko, sugatan sa pamamaril sa Polomolok, South Cotabato
POLOMOLOK, South Cotabato – Nagpapatuloy pa ang imbestigasyon ng PNP hinggil sa panibagong insidente ng pamamaril sa Purok 1, Brgy Lapu, Polomolok, South Cotabato pasado ala-1:40 kahapon.
Kinilala ni Polomolok PNP deputy cheif Lt. Reden Cuevas ang mga biktima na sina Usdad Cossain, 55 anyos, Jerome Retuta, 29 anyos, at Peter Espada, 41 anyos, pawang mga mekaniko at residente ng nasabing lugar.
Lumabas sa inisyal na imbestigasyon ng PNP na ang mga biktima ay binaril ng mataas na kalibre ng armas habang abala sa pagaayos ng Nissan pickup truck sa parking area ng kanilang kliyente sa nasabing lugar.
Matapos ang krimen, ang mga suspek ay agad na tumakas sakay ng motorsiklo patungong Barangay Bentung Sulit..
Narekober ng mga pulis sa pinangyarihan ng krimen ang 12 basyo ng 5.56mm na baril.
Ang mga sugatang biktima ay isinugod sa Polomolok Municipal Hospital pero sila ay agad na inilipat sa South Cotabato Provincial Hospital sa Koronadal City.
Ayon kay Cuevas, posibleng may kaugnayan sa trabaho ang motibo sa nasabing pamamaril.
Inaalam pa ng Polomolok PNP ang identities ng mga suspect.