Magpet vice mayor to act as mayor pero naka "work from home"

KIDAPAWAN CITY - Hanggat wala pang official order o letter mula sa National or Regional DILG Office sa uupong caretaker ng Magpet, Cotabato, mananatiling acting mayor si Vice-mayor Bebot Maranon.

Nabatid na wala pang instruction mula sa DILG na uupo bilang caretaker si MLGO Officer Ivy Cervantes matapos na ma-quarantine ang lahat ng miyembro ng Sangguniang Bayan.

Kahit naka quarantine ay tuloy ang pagiging acting mayor ni Maranon kaya walang pagbabago sa normal na operasyon ng munisipyo.

Samantala, kahapon ay inanunsyo na ni Magpet Mayor Florenito Gonzaga na siya ay positibo sa virus at patuloy na nagpapagaling sa ospital.

Sa naunang panayam kay MLGO Officer Cervantes na uupo lamang itong caretaker oras na lalabas ang official order mula sa DILG.

Bilang caretaker ng munisipyo, limitado lamang ang saklaw nitong kapangyarihan ngunit tiniyak ang patuloy na pagbibigay serbisyo sa mga mamamayan ng bayan.

Kabilang na dito ang pagsiguro na hindi nahahadlangan ang basic services sa mga tutungo sa municipal hall ng bayan dahil mayroon namang mga department heads.

Isa rin sa magiging papel na gagampanan ni Cervantes bilang caretaker ay ang pag-apruba para sa disbursement ng pambayad sa kuryente, tubig, telecommunication services at iba pa, kabilang na rin ang payroll ng mga empleyado.

Sa ngayon hindi pa tiyak ni Cervantes kung kailan makakabalik ang mga opisyal na una nang pinayuhan ng Municipal Epidemiology Surveillance Unit o MESU na hindi muna sila maaaring makalabas matapos ma-expose sa COVID-19.