10 ASG members sumuko sa militar sa Sulu

COTABATO CITY --- Sampung mga teroristang Abu Sayyaf sa Sulu ang sumuko sa pamahalaan noong nakalipas na linggo, ayon sa ulat ng Western Mindanao Command.

Mismong si Lt. Gen. Corleto Vinluan, Jr., commander ng WestMinCom na naka-base sa Zamboanga City, ang siyang nag-kumpirma ng naturang pagsuko ng mga myembro ng Abu Sayyaf na nais nang magbagong buhay.

Ang sampung Abu Sayyaf ay pumayag na sumuko matapos pakiusapan ng mga opisyales ng 1^st Marine Battalion ng Philippine Navy, isa sa maraming mga military units na tumutugis sa naturang grupo na nagkakanlong sa Sulu.

Ayon kay Lt. Gen. Vinluan, malaki din ang naitulong ng anti-terror Joint Task Force Sulu at ng 4^th Marine Brigade sa pagpa-suko sa sampung Abu Sayyaf.

Sila ay boluntaryong nagsalong din ng mga armas bago nanumpa ng katapatan sa gobyerno sa isang simpleng programang organisado ng 1^st Marine Battalion at ng 4^th Marine Brigade sa bayan ng Panamao sa probinsya ng Sulu.