Abogado, patay sa pamamaril sa Surallah, South Cotabato

KORONADAL CITY - Binaril at napatay ng di pa nakilalang mga suspect ang isang abogado sa Surallah, South Cotabato pasado alas 5 ng hapon Mierkules. 

Nakilala ang biktima Atty. Juan Macababbad kung saan pinagbabaril ng dalawang suspek sa harap mismo ng kanyang bahay sa Surallah.

Kinumpirma din ito ni IBP South Cotabato chapter president Lawyer Remegio Roxas at kinundina ang mga gumawa nito.

Hiling ni Atty. Roxas at mga kapuwa abogado sa lalawigan sa PNP na kilalanin at arestuhin ang mga suspect, pati na ang utak sa pagpatay.

Hindi pa tukoy ng mga otoridad ang motibo.

Si Atty. Macababbad ay kilala bilang abogado ng bayan dahil kalimitan ay pro-bono o libre ang serbisyo nito sa mga mahihirap na mamamayan.

Siya ay kumandidato noong 2019 local elections sa Surallah bilang vice mayoral candidate pero siya ay nabigo.

Si Atty. Macababbad ay kasapi ng National Union of Peoples Lawyers (NUPL) at IBP-South Cotabato chapter.

SA PANAYAM NG RADYO BIDA KORONADAL ngayong umaga kay Surallah town police chief Major Romy Castañares, sinabi nito na tatlo ang mga suspect na may kinalaman sa pagpatay kay Atty. Macababbad.

Ang pamamaril ay naganap sa Zone 2B, Barangay Libertad Surallah.

Ayon kay Castañares, nagkunwaring kliyente ni Atty. Macababad ang isa sa tatlong mga suspect na sakay ng motor.

Nakuha ng PNP ang isang folder na dala ng isa sa mga biktima na naiwan sa crime scene.

Kinumpirma din ni Castañares na nakatatanggap ng death threat si Macababad na may kaugnayan sa kanyang trabaho.

Pitong empty shell ng cal. 45 pistol ang nakuha sa harap ng bahay ng pinaslang na abogado.