Child, 3, went missing, later found dead in South Cotabato river
TANTANGAN, South Cotabato - Matapos ang magdamag na paghahanap, patay na nang matagpuan ng kanyang mga kaanak ang tatlong taong gulang na si Charidylle alyas "Gogoy" Pran, sa Tantangan, South Cotabato, dakong 7:00 ng umaga kanina.
Ang biktimang si Pran ay natagpuan sa Barangay Dumadalig, Tantangan, ilang kilometro ang layo mula sa kanilang lugar na Barangay New Iloilo sa nasabing bayan.
Sinabi sa Radyo - Bida ni Tantangan MDRRM action officer Michael Lester Tomanan na posibleng nadulas ang biktima at nahulog sa sapa habang naglalaro kasama ang iba pang mga bata sa kanilang lugar dakong alas 6:00 ng hapon kahapon.
Ayon kay Tomanan, dahil sa lakas ng agos ng tubig sa sapa bunsod ng malakas na ulan at madilim na paligid, nahirapan sa retrieval operation ang kanilang rescue team.
Sa katunayan, ayon kay Tomanan dahil peligro na ito sa kanila, pansamantala nilang itinigil ang paghahanap sa biktima.
Ipinahayag ni Tomanan na mismong tiyuhin ng batang biktima ang unang nakakita sa bangkay nito sa bahagi ng sapa na nasa boundary na ng Dumadalig at karatig bayan ng Lutayan, Sultan Kudarat.
Kaugnay nito, nanawagan naman si Tomanan sa mga mamamayan ng Tantangan na ngayong madalas ang malakas na mga pag-ulan maging maingat at maging mapagmatyag lalo na sa posibleng pagtaas ng tubig na maaring magdulot ng mga pagbaha.