Estudyante patay, 2 iba pa sugatan sa banggaan ng mga motor sa Parang, Maguindanao Norte
Local News • 16:30 PM Thu Apr 13, 2023
546
By:
DXMS RADYO BIDA
DEAD ON ARRIVAL sa ospital ang isang estudyante habang nagpapagaling naman ang nakabanggan nito nang magkasalpukan ang minamanehong nilang mga motorsiklo sa Purok Molave Brgy. Poblacion 1, Parang, Maguindanao Del Norte, pasado alas 9:00 kagabi.
Kinilala ni Parang town police chief Major Christopher Cabugwang ang nasawi na si Steven Claude Molina Celestino, 21-anyos na taga Sitio Cuba Brgy. Gumagadong Calawag, Parang.
Habang sugatan naman si Dave Usman, 19-anyos at ang angkas nitong menor de edad, na pawang taga bayan ng Matanog.
Ayon sa imbestigasyon ng Parang PNP traffic section, minamaneho ni Celestino ang kanyang Yamaha Sniper habang sakay naman si Usman sa kanyang Honda CGX.
Mula ang dalawa sa magkabilang lane nang pagdating sa pinangyarihan ay nagkasalpukan ang mga ito.
Dinala pa sa pagamutan si Celestino pero binawian din ito ng buhay.
Muli namang nagpaalala ang Parang PNP sa mga nagmamanehong driver na mag-doble ingat upang maiwasan ang kahalintulad na aksidente.