UPDATE: Tatay, 2 anak na babae patay sa ambush sa Datu Hoffer, Maguindanao del Sur
Mindanao Armed Conflict • 07:15 AM Wed Mar 29, 2023
521
By:
DXMS RADYO BIDA COTABATO
Mayor Bai "Bong-Bong" Ampatuan meets with police authorities following the brutal killing of civilians in an ambush in Datu Hofer. (Photo from Datu Hofer LGU)
UMAKYAT pa sa tatlo ang nasawi kabilang ang dalawang mga batang babae sa ambush sa Sitio Bagurot, Barangay Tuayan Mother, Datu Hoffer, Maguindanao Del Sur pasado alas 7:00 ng gabi nitong Lunes.
Sa panayam ng DXMS Radyo Bida kay Datu Hoffer town chief Police Captain Ramillo Serame, sinabi nito na ang mga nasawi sa pananambang ay ang padre de pamilya na si Sadam Mamasainged at ang anak nitong sina Hanafia na tatlong taong gulang pa lamang at ang walong buwang sanggol na si Hamdi.
Sakay ang limang miyembro ng pamilya sa isang payong-payong patungong Sitio Bagurot, Barangay Tuayan Mother, Datu Hoffer nang biglang paputukan ng mga armadong kalalakihan.
Nakaligtas naman sa pananambang ang nanay ng dalawang mga bata na si Faira Mamasaingaed at isa pang menor de edad na batang babae na kanyang pamangkin.
Narekober sa crime scene ang mga basyo ng M16 at M14 rifle.
Patuloy pang inaalam ng PNP ang motibo ng naturang ambush.
Kaugnay nito ay mariing kinondena ng Datu Hoffer LGU ang nangyaring pananambang.
Ipinag-utos na rin ni Datu Hoffer Mayor Bai Bongbong Ampatuan sa PNP ang mabilisang imbestigasyon upang mapanagot ang nasa likod ng krimen.