3 patay dahil sa cholera outbreak sa Maguindanao del Sur

TATLO katao ng nasawi nang tamaan ng cholera bago magbagong taon sa Brgy. Tamar, Talayan, Maguindanao del Sur.

Ito ang pahayag ng Maguindanao del Sur Integrated Provincial Health Office bilang paglilinaw.

Unang sinabi sa DXMS Radyo Bida ni Talayan MDRRM Officer Fuad Samola na lima ang nasawi.

Sinabi ni Samola na abot sa 22 ang na-ospital matapos makaranas ng pagsusuka, pananakit ng tiyan at pagkahilo.

Sa ngayon, sampu pa ang nananatili sa ospital. 

Posibleng mula sa kontaminadong tubig mula sa apat na mga poso sa Sitio Sinindulan ang dahilan ng outbreak.

Inaantay na lamang ngayon ng LGU ang resulta ng isinagawang tests sa mga nakuhang water sample.

Higit isang daang mga residente ang umaasa sa nasabing water source, pero ngayon, pinagbawalan muna sila ng LGU.

Namigay naman ng libreng tubig ang LGU mula sa mga water refilling station para sa ligtas na tubig inumin.

Habang nagbigay rin ng tulong ang lokal na pamahalaan sa mga pamilya ng limang mga nasawi.

Nauna rito, iniulat ng IPHO Maguindanao na pinamumunuan ni Dr. Mohammad Ariff Baguindali na posibleng cholera ang tumama sa mga pasyente. Pinayuhan niya ang mga mamamayan na pakuluan ng mabuti ang tubig bago inumin.

Tatlo ang ang nasawi at hindi lima tulad nang unang naiulat ng municipal disater office, ayon kay Baguindali.