Seguridad ng lahat, tiniyak ng Cotabato City PNP kasunod ng serye ng pamamaril
PINAWI ng Cotabato City Police ang pangamba ng publiko sa harap ng sunod-sunod na kaso ng pamamaril sa lungsod at tiniyak na ginagawa nito ang lahat ng paraan upang matiyak na ligtas ang bawat Cotabatenio.
Sa panayam ng Radyo Bida kay Cotabato City Police Spokesperson Lt. Col. Carmelo Mungkas, sinabi nito na walang dapat ikabahala ang mga residente ng lungsod dahil laging nakahanda ng tropa ng PNP sa pagresponde sa anumang krimen.
Patunay aniya rito ay ang pagkasawi ng dalawang riding tandem suspects na namaril ng isang lalaki sa Sinsuat Avenue.
Sinabi ni Mungkas na dahil sa pagpapatrolya na ginawa ng PNP ay agad itong nakapagresponde at naharang ang mga riding tandem suspects na unang nagpaputok.
Sinabi ni Mungkas na posibleng sangkot din ang mga ito sa iba pang kaso ng barilan ng lungsod, bagay na patuloy ngayong bineberipika ng PNP.
Samantala, kaugnay nito hiniling ni Mungkas ang kooperasyon ng publiko lalo na sa pagbibigay ng impormasyon upang agad na maresolba ang mga kaso ng pamamaril sa lungsod.