5 kalalakihan huli sa anti-drug operation ng Army at PNP sa Maguindanao del Sur
Peace and Order • 10:00 AM Fri Dec 22, 2023
6
By:
DXMS
Photo from Anggal Midtimbang municipal PNP.
NAPIGILAN ng mga pulis ang tangka sanang pagpupuslit ng iligal na droga ng limang mga kalalakihan matapos silang mahuli sa police checkpoint ng Datu Anggal Midtimbang PNP sa Sitio Keteb, Brgy. Mapayag, Datu Anggal Midtimbang, Maguindanao Del Sur, pasado alas 7:00 kagabi.
Kinilala ni Datu Anggal Midtimbang PNP chief Major Jun Olis ang mga nahuli na sina Jonathan Madi, 19-anyos, Alex Kaminsa, 19-anyos, Mohammad Madi, 21-anyos, Ariel Laguialam, 24-anyos, lahat taga Datu Odin Sinsuat at Hassim Macmod, 20-anyos, taga Poblacion, Talitay, Maguindanao del Norte.
Katuwang ng PNP ang 2nd Mechanized Battalion ng militar sa pagkahuli sa limang mga drug suspects.
Nakumpiska mula sa mga ito ang tatlong mga sachet ng shabu na nagkakahalaga ng P68,000.
Ayon sa intel reports, mula sa bayan ng Talitay ang mga suspek sakay ng tatlong mga motorsiklo patungo sanang Poblacion, Dalican, Datu Odin Sinsuat, pero nang pagsapit sa checkpoint ay nadiskubre ang dalang droga mula sa isa sa kanilang mga kasama.
Nasa kostudiya na ngayon ng Datu Anggal Midtimbang PNP ang limang naaresto.