Suspects in killing of 2 candidates for BSKE in Cotabato City charged
COTABATO CITY - Kasong murder at frustrated murder, isasampa ng PNP sa 12 katao na sangkot sa nangyaring pamamaril sa RH-12, Cotabato City.
Kabilang sa kakasuhan ang isang pulis at aspiring barangay chairman.
ITO ang sinabi sa DXMS Radyo Bida ni Police Station 1 Commander Capt. Jemu Ramolete.
Maliban sa murder at frustrated murder, ilan sa mga ito ay kakasuhan din ng paglabag sa election gun ban dahil sa nakumpiskang mga baril.
Sa ulat, kabilang sa mga nahuli ay si Juhalidin Ladesla Abdul alias "Boyong” na kumakandidato bilang Barangay Chairman ng Rosary Heights 12 at Police MSgt. Pauti Dianal Mamalapat na nakatalaga sa Maguindanao del Sur PNP, pawang mga residente ng nasabing lugar.
Anim sa mga nahuli ay mga residente ng Guindulungan, Maguindanao del Sur kabilang ang isang 19-anyos na estudyante.
Habang ang apat na iba pa ay taga lungsod kabilang ang isang babaeng social worker.
Nabatid na ang mga nahuli ay sangkot sa nangyaring pamamaril sa RH-12 na ikinasawi ng tatlo katao kabilang ang dalawang kandidato.
Sila ay nakunan ng mga baril at bala.
Ang mga nasawi ay agad ding inilibing kanina batay sa paniniwalang Islam.