2 kasapi ng BIFF, patay sa engkwentro sa Maguindanao Sur

CAMP SIONGCO, Maguindanao del Norte - Dalawang mga kasapi ng Bangsamoro Islamic Freedom Fighters (BIFF) ang nasawi matapos na makasagupa ang mga operating troops ng 1st Brigade Combat Team (1BCT) sa inilatag na decisive military operations sa Datu Saudi Ampatuan, Maguindanao del sur, mag-aalas 5:00 kahapon ng umaga (March 9, 2024).

Ayon kay Brigadier General Jose Vladimir Caraga PA, Commander ng 1BCT na dalawalang bangkay ng mga BIFF ang narekober ng kanyang mga tropa na patuloy pang inaalam ang pagkakakilanlan.

Agad namang tumakas ang mga armadong pangkat makaraang di nakayanan ang pwersa ng militar. Dahil dito nagsagawa ng clearing operation ang tropa ng kasundaluhan sa pinangyarihan ng engkwentro sa Brgy. Kitango kungsaan narekober ang isang M16 rifle at mga bala, isang Cal. 50 Homemade Barret; at 2 IEDs (PVC pipe bomb).

Sa ngayon patuloy na tinutugis ng militar ang nasa 20 bilang ng mga BIFF sa ilalim ng Karialan Faction na tumakas makaraang makasagupa ang mga operating troops ng 1BCT kasama ang iba pang unit ng militar.

Pinuri ni Major General Alex S Rillera PA, Commander ng 6ID/ JTFC ang tropa ng pamahalaan sa matagumpay na military operations. “Patuloy ang ating panawagan sa mga miyembro ng BIFF na magbalik loob na sa pamahalaan, dahil hindi kami mangingiming pulbusin kayo kung patuloy pa rin kayong lalaban sa ating gobyerno. Ang mga narekober nating mga baril at pampasabog ay indikasyon lamang sa mga masasamang balakin nila na nahadlangan ng ating mg kasundaluhan”, pahayag ni Maj. Gen. Rillera.

Iginiit pa ng Division Commander na kahit saan pa magtago ang mga kalaban ay kaya silang lipulin ng tropa ng militar dahil sa mga makabagong teknolohiya ng hukbo sa pakikidigma, bagay na hinihikayat ni Maj. Gen. Rillera ang mga BIFF, Daulah Islamiya at iba pang mga ekstremistang grupo na sumuko at magbalik loob sa pamahalaan.