2 kasapi ng Highway Patrol Unit sa BARMM, naaresto dahil sa kasong extortion sa Cotabato City
MAGKAIBANG kaso ang kakaharapin ng dalawang pulis na kasapi ng Regional Highway Patrol Unit - BAR matapos silang maaresto sa entrapment operation ng PNP Intregrity Monitoring and Enforcement Group o IMEG sa bahagi ng Zone1, PCHILL, Rosary Heights 1, Cotabato city pasado alas sais ng gabi kanina.
Sa panayam ng DXMS Radyo Bida kay IMEG Mindanao Field Unit Acting Chief Lt. Col. Aldrin Abila, isinagawa nila ang operasyon sa mismong tanggapan ng RHPU-BAR laban sa limang mga pulis na sangkot sa robbery extortion.
Ayon kay Abila, matagumpay na nadakip ang isa sa mga suspek na kinilalang si PMSG Nassrollah Gani.
Sinabi ni Abila na nakatanggap sila ng complaint mula sa isang indibidwal matapos ma-impound ang sasakyan nitong Honda Civic dahil sa illegal transfer of plate.
Ayon sa complainant, hiningian siya ng P50,000 ng limang kasapi ng RHPU kapalit ng pagbawi sa kaniyang sasakyan.
Nakuha kay Gani ang P18,000 cash money, 2 pcs cellular phones, susi ng Toyota Wigo, 1 pc Zigana PX-9 caliber 9mm pistol, 1 pc 9mm live ammunition, 1 pc Galil Rifle, 1 pc magazine of Gail Rifle, at 28 pcs live ammunitions.
Samantala, nagtamo ng injury at sugat sa katawan ang kasama nitong si PEMS Benigno Mercado matapos tumalon sa hagdan ng RPHU.
Bagamat hindi ito kasali sa kasong robbery extortion, sinabi ni Lt. Col. Abila na sasampahan pa rin siya ng kasong direct assault matapos magpaputok ng baril sa mga operating unit.
Patuloy namang tinutugis ang apat na mga kasama ni Gani.
Sinikap naman ng Radyo Bida na makuha ang panig ni Gani ngunit sinabi nito na bahala na ang kaniyang legal counsel.