3 taga MagNorte at NoCot, huli sa QC dahil sa kasong syndicated estafa
Breaking News • 15:30 PM Mon Nov 20, 2023
564
By:
NDBC NCA
NAHULI ang tatlong mga suspek ng Criminal Investigation and Detection Group o CIDG at ng Eastwood Police Station ng Quezon City Police District, mag aalas 4:00 ng hapon kahapon.
Kinilala ng CIDG ang mga nahuli na sina Ivan Baja alyas Anthony Baja o kilala ring Stephen Aniñon Lopez, 41-anyos; Lorna Fuentes Maquilan, alyas Karen Fuentes Lopez, 47-anyos, pawang taga Poblacion 5, Midsayap, Cotabato; at isang Menchie Malmis Torsiende alyas Sherny Gonzalez, 43-anyos na taga Sarmiento, Parang, Maguindanao del Norte.
Naaresto ang mga suspek sa kanilang
tinutuluyang condo unit sa nasabing lungsod.
Ang kasong syndicated estafa laban sa tatlo ay nag-ugat sa kanilang pinapatakbong investment scheme noon sa Landasan, Parang Maguindanao del Norte.
Ayon sa ulat ng PNP, nagsampa ng kaso ang isang Avelyn Melgarejo na nagbigay ng ₱10-milyon sa isa sa mga suspek, kapalit ng malaking interest dahil gagamitin umano ito sa kanilang negosyo sa Metro Manila.
Ilang taga Landasan din na nabiktima ng nasabing investment scheme ang nagsampa ng kaso laban sa mga suspek.
Nitong Nov.13, lumabas ang warrant of arrest ng tatlo at saka sila hinuli nitong Linggo.
Walang inirerekomendang piyansa ang syndicated estafa.