Abuloy sa patay ninakaw sa Koronadal, mga suspek huli

KORONADAL CITY – Huli ang dalawa katao matapos na nakawin ang abuloy sa patay na nakaburol sa Southern Funeral homes, Gensan Drive, Koronadal City pasado 1:45 kaninang madaling araw.

Nakilala ang mga suspek na sina Richard Navarro, 34 taong gulang at security guard na taga-Barangay Caloocan, Koronadal City at si Bienvinido De Pedro, 31 taong gulang at nakatira sa Barangay Zone 1, Koronadal City.

Sinabi ni John Garcia, isang retired pulis na naroon sa lamay, nakita niyang kinuha ng isa sa dalawang mga suspek ang abuloy sa patay na abot sa sa halagang P3,500.

Ayon kay Garcia, kaunti lamang ang tao sa burol kayat agad niyang napansin ang mga suspek.

Ayon sa imbestigasyon, lumapit umano si De Pedro sa donation box at nag kunwaring magbibigay ng donasyon.

Pero, ayon kay Garcia, kitang kita niyang dinukot ni de Pedro ang mga pera sa box. Ang kasama nitong si Navarro ay nagsilbing lookout sa labas.

Agad na tumawag ng police si Garcia at naaresto ang dalawa.  Itinanggi nina De Pedro at Navarro ang alegasyon.

Ang Southern Funeral Homes ay merong CCTV camera na makapagpatunay sa pangyayari.