DOS PNP pinaputukan ng isang lalaki, isang pulis sugatan, suspect nahuli

DATU ODIN SINSUAT, Maguindanao Norte - KINILALA ANG SUGATANG pulis na si Staff Sergeant Michael Lacsasa na residente rin ng Datu Odin Sinsuat, Maguindanao del Norte at nakatalaga sa 2nd Provincial Mobile Force Company ng Maguindanao PPO sa Shariff Aguak, Maguindanao del Sur.

Sinabi sa DXMS Radyo Bida ni Datu Odin Sinsuat PNP Investigator Staff Sergeant Benjamin Bedo na habang nagpapatrolya ang biktima kasama ang ibang pulis ay may napansin silang kahina hinalang kilos ng lalaki.

Lalapitan sana ito ng mga pulis pero biglang namaril ang suspek na si Sukarno Guiaber.

Ang biktima at mga kasama nito ay sakay ng motorsiklo kung saan madalas silang umiikot sa lugar para sa seguridad ng bayan katuwang ng Datu Odin Sinsuat PNP.

Nangyari ang pamamaril sa old market, Barangay Poblacion Dalican, Datu Odin Sinsuat pasado alas onse ng umaga kanina.

Agad namang naaresto ang suspek matapos isagawa ng mga otoridad ang hot pursuit operation.

May mga nagsasabi na unang bumaril ang mga pulis kaya nanlaban ang suspek pero ito'y patuloy pang iniimbestigahan.

Ino-obserbahan na ang kalagayan ng biktima na nagtamo ng maraming tama ng bala sa kamay, braso at panga habang ang suspek ay nagtamo rin ng tama ng bala sa katawan dahil sa hot pursuit operation.

Patuloy na inaalam ng Datu Odin Sinsuat PNP sa pangunguna ni Major Regie Albellera kung may mga kasama pa ba ang suspek.