Look: Cargo truck helper patay, driver sugatan sa aksidente sa North Cotabato
KIDAPAWAN CITY – Patay ang helper ng ten wheeler truck habang sugatan naman ang drayber nito matapos na tumaob ang nasabing sasakyan sa national highway sa Makilala, North Cotabato kanina.
Ayon sa report, nawalan ng preno ang cargo truck na may kargang semento hangganan ng Sitio Patulangon, Malasila at Purok 11-B barangay Poblacion, Makilala North Cotabato.
Kinilala ang drayber ng naturang sasakyan na si Marcelino Salvacion, 59-anyos at ang nasawing helper na si Dionesio Sibag, kapwa residente ng Esperanza, Sultan Kudarat.
Sinabi ni Makilala PNP town police chief Police Major Johhny Rick Felongco Medel na posibleng nag-malfunction preno ng sasakyan sa pakurbadang daan hanggang sa tumaob ito sa naturang lugar, pasado alas-5:00 ng umaga.
Kapwa naipit ang drayber at helper ng truck sa tumaob na sasakyan.
Unang na-rescue ng mga residente sa lugar ang drayber hanggang sa nakalabas ito at isinugod sa ospital habang pahirapan naman ang pagkuha sa naipit na helper.
Naisugod din sa bahay pagamutan si Sibag pero ideneklarang dead on arrival.
Ayon sa mga nakasaksi mula pa sa mataas na bahagi ng highway ay nawalan na umano ng preno ang sasakyan kaya walang humpay ang busina ng drayber hanggang sa nahulog na lamang ito sa inaayos na kalsada sa lugar.