Nutrition month celebration, nakatutok pa rin sa pagresolba ng problema sa pagka-bansot

KORONADAL CITY, South Cotabato- Aminado si National Nutrition Council o NNC 12 Nutrition Officer III Mayette Flores na sa kabila ng kanilang malawakang kampanya konti lamang ang ibinaba ng kaso ng stunting o pagkabansot sa rehiyon.

Bukod dito ayon kay Flores ang Pilipinas ay pang siyam sa stunting prevalence rate o may pinakaraming bansot sa buong mundo.

Ito ang dahilan kung bakit ayon kay Flores, nakatutok pa rin sa pagresolba ng stunting ang nutrition month celebration na pinangungunahan ng NNC tuwing Hulyo.

Kinumpirma din ni Flores na base sa pinakahuling datos ng NNC 12 noong 2019, nangunguna sa may pinakamaraming bansot sa Soccsksargen ang Tacurong City na may 10.40 percent o 910 cases.

Pangalawa naman ang Cotabato City na may 10.21 percent. Ang Sultan Kudarat na may 9.15 percent ay nasa pangatlong pwesto.

Ipinahayag din ni Flores na ang buong region 12 ay may 35,244 o 8.90 percent stunted o mga batang kulang ang tangkad sa kanilang edad na isang uri ng malnutrisyon.

Binigyan diin ni Flores na mahalaga na maresolba ang nasabing problema dahil bukod sa kalusugan ng mga bata, nakaapekto din ang stunting sa ekomoniya ng bansa.

Kaugnay nito sinabi naman ni NNC 12 Nutiriton Officer II Leah Fe Utlang na kailangan sa pagresolba ng problema sa malnutrisyon ang sapat na nutrition sa unang 1,000 days ni Baby.

Ibig sabihin nito ayon kay Utlang sa pagbubuntis pa lamang dapat ay matiyak na ang nutrition ng mga ina.

Ito ay maliban pa sa mariing pagpapatupad ng breastfeeding lalong lalo na sa mga bagong silang na sanggol.