Pagpatay sa kakandidatong Barangay Kapitan sa Midsayap, kinundina ni Mayor Sacdalan
Breaking News • 15:45 PM Tue Aug 29, 2023
777
By:
DXMS Radyo Bida
COTABATO CITY – Mahigpit na kinundina ni Midsayap Mayor Rolly Sacdalan ang naganap na pagbaril at pagpatay sa kandidato sa pagka-barangay Kapitan na binarily sa harap ng municipal hall kanina.
“Mariin ko itong kinukundina, hindi papayag ang mga peace loving people of Midsayap na maulit ito, sinuman ang may gawa nito ay nararapat na mapanagot upang mabigyan ng hustisya ang pagkamatay ni Haron Dimalanis,” ayon kay Sacdalan sa isang news conference.
Dahil diyan, tiniyak ni Sacdalan ang sapat na seguridad ng lahat ng mga maghaharap ng kanilang kandidatura sa Comelec office.
Ang tanggapan ng Comelec ay nasa municipal hall grounds.
Si Dimalanis, 40 taong gulang, ay katatapos lang nagfile ng kanyang COC sa Comelec at kumakain ng kanyang pananghalian dakong alas 11:45 ng umaga nang pagbabarilin ng dalawang lalaking sakay ng motor at naka bonnet.
Si Dimalanis ay idineklarang dead on arrival sa Amado Diaz District Hospital. Sugatan ang kanyang supporter na si Habir Kambiong, 27.
Si Dimalanis ay kakandidato sana sa pagka-barangay Kapitan ng Barangay Malingao, isa sa 13 barangay ng Midsayap na ngayon ay sakop na ng Special Geographic Area ng BARMM.
Ayon kay Sacdalan, mainit ang local politics sa naturang barangay. Ang barangay Kapitan nito ay binaril at napatay noong 2019 sa kahabaan ng Quezon Avenue, sa Midsayap.
Nagpapatuloy pa ang imbestigasyon ng pagpatay kay Dimalanis.
Nakaalerto na ang buong PNP at Army sa Midsayap at kalapit lugar.
