Pre-trial sa kasong murder sa Hall of Justice, di natuloy, suspect sa kaso binugbog
COTABATO CITY - “Dinadaan na nga natin sa legal na proseso, huwag nating ilagay sa kamay ang batas, mali po yan, otherwise, kayo naman ang masasampahan ng kaso.”
Ito ang paalala at panawagan ni Cotabato City PNP Director Col. Querubin Manalang Jr. sa mga sangkot sa nangyaring pambubogbog sa Hall of Justice ng Cotabato City kaninang umaga.
“Lalo lang pong lalala ang problema at madadamay kayo, pabayaan natin ang hustisya na gumulong,” dagdag pa ni Manalang.
Nasa PNP vehicle palang kasi ang 12 mga akusado na dadalo sana sa arraignment at pre-trial sa korte nang sugurin, kuyugin at bugbugin ito ng mga supporters ng kabilang kampo.
Sa dami ng mga sumugod sa mga akusado ay hindi na ito naawat ng mga pulis.
Dahil sa insidente ay hindi na natuloy ang arraignment.
Ayon kay Manalang, sasampahan naman ng kaso ang mga nambugbog matapos matukoy ng mga akusado.
Nabatid na sinampahan ng kasong multiple murder with double frustrated murder ang 12 mga akusado dahil sa nangyaring pamamaril noong gabi ng Oct.22.